За колапсот на здравствениот систем, целосно станавме свесни за време на пандемијата. Тогаш на површина излезе сета негрижа, неефикасност и неподготвеност на државата за справување со вонредни ситуации.
Но за хронично болните и пациентите со ретки болести овие состојби важат постојано. Достапни терапии не се набавуваат навремено, а нови терапии воведени во светот и регионот не се овозможуваат. За профитно ориентираниот економски систем, очигледно не е важен човечкиот живот. Како социјалисти не смееме да ги игнорираме состојбите во јавното здравство, напротив се вклучуваме на отпорот против секоја деградација на здравството.
Во понеделникот, во 11:55 часот (симболично 5 до 12), пациентите кои боледуваат од цистична фиброза организираа протест пред Министерството за здравство за обезбедување на модуларна терапија. Исто така, преку петиција собрани биле над 10.000 потписи за остварување на нивните барања. Додека оваа терапија е неопходна за болните од цистична фиброза, го продолжува нивниот животен век и од корен ја менува нивната состојба, Министерството за здравство нема слух за луѓето чиј живот е во прашање.
Цистична Фиброза е генетска болест која има мултисистемско зафаќање, а најкритично се зафатени белите дробови и панкреасот. Барањата на Асоцијацијата за цистична фиброза се следните:
- Право на модулаторна терапија за сите пациенти со ЦФ.
Државата веднаш да обезбеди средства за воведување на модулаторна терапија по принципот на сите европски и балкански држави, со соодветен план и стратегија за опфаќање на целата популација која е заболена од оваа ретка болест.
- На Клиниката за пулмологија и Клиниката за детски болести да се создадат услови за лекување на пациентите според протоколите за лекување на оваа состојба со формирање на стручни тимови и соодветни и стандардизирани услови за хоспитализација.
- Фондот за здравствено осигурување да обезбеди медицински помагала кои се неопходни за секој пациент во секојдневната терапија а тоа се:
- Инхалатори со висок степен на дифузност, по препорака на доктор специјалист
- Пеп/Флатер за физикална терапија
Од Асоцијацијата апелираат : „Здравјето и животот на група млади луѓе се нешто на кое не смее да се става цена и не смее да се игнорира! Ние имаме право на лек, а тие обврска да ни го обезбедат!“
Социјалистичка зора во целост ги поддржува барањата на Асоцијацијата, и стои рамо до рамо со пациентите во нивната борба за живот и лек.
Само заедно можеме да изградиме општество во чиј центар ќе биде човекот.